香港九龍東皇冠假日酒店 Crowne Plaza Hong Kong Kowloon East

服務詳情

服務種類:
婚宴服務
整體評分:
3.8
3.8分
服務/套餐價格:
中式: HK$9667/圍 起
西式: HK$650/位 起
80

評語 提交評語

irisyanyan 2018/07/02 09:32:23

我最中意佢個場無柱同夠高,同埋我擺53圍,佢地三間ballroom先可以容納到咁多人,仲有就係reception area都夠grand,加上之前去朋友飲宴都試過,就決定join! 落訂之後有一個consultant跟到我big day個日,又會有個姐姐跟出跟入,幫我擺裙!雖然我個晚無乜點食,但Dfeedback都話唔錯,我擺50幾圍,上菜速度都夠熱夠快!唯一中間少少logistic問題係,我係個道證埋婚,個一下問佢地拎D物資上黎問左好耐都無,結果要搵翻PIC個經理!

整體滿意度 
4.5
服務態度 - 婚前接洽 
5
服務態度 - 婚宴當日 
4
場地環境 
4.5
食物質素 
4
服務承諾達到 
4.5
價格適中 
4
商戶名稱
香港九龍東皇冠假日酒店
婚宴日期 
2018/03/19
是次最終消費 
HK$ 10000
 / 圍
grara_38 2017/10/30 11:59:23

因為我想喺草地做證婚,而將軍澳皇冠假日酒店三樓有個空中花園,所以最後揀咗呢度。但係佢哋服務真係一般般,真係激死我!!!😤😤😤

我哋嗰日個run down係草地證婚後再進場多一次,之後就落ballroom食buffet。而我哋plan好咗喺進場前播成長片段,但我哋兩個喺出面等極都未進得場,唔知入面發生咩事,之後聽返啲朋友講話原來播片嘅時候播唔到,而且拖咗好耐都搞唔掂,之後唯有叫我哋進場先。好啦,進場應該有進場音樂架嘛,預先都俾哂佢哋,但點知佢哋冇播到進場音樂。其實我自己都冇為意,好在我個司儀識執生,意識到冇咗個音樂,自己幫我清唱等我哋進場!

其實我哋喺出面等進場,就問啲staff,佢哋話︰「入面未Ready好,啲人未坐定!」但係我進場後一落台個經理就衝埋嚟話︰「唔好意思呀!頭先有啲誤會,可能係同個司儀有啲誤會。」我老公真係太好人,就話過咗去喇,由得佢。之後,我哋問返個司儀,佢話根本係佢哋set機有問題,根本播唔到片播唔到歌!真係嬲爆!

整體滿意度 
2.5
服務態度 - 婚前接洽 
5
服務態度 - 婚宴當日 
4
場地環境 
4
食物質素 
4
服務承諾達到 
1
價格適中 
2.5
商戶名稱
香港九龍東皇冠假日酒店
婚宴日期 
2016/12/16
是次最終消費 
HK$ 800
 / 位
Green 2017/02/28 21:25:52

搵場地嘅時候都睇過1881,雖然1881真係好靚,但我哋唔係好滿意個草地。半島嗰啲都睇過,但唔啱。其實原本都覺得將軍澳好似唔夠high class,但因為個草地真係好靚,同埋就返屋企啲長輩唔使去咁遠,所以就揀咗呢度。

其實講返一開始我係無諗住結婚,但因為我買咗件婚紗去影相,我老公就話不如唔差在請多啲人嚟睇,結果就擺3圍全部親戚,$45000,包半個鐘喺草地嘅時間。後來我老公又話反正最靚嘅衫同鞋都買晒,不如再叫多四十幾五十人嚟睇啦,而且半個鐘草地時間真係太少,於是就join咗個草地package。個package包咗草地場2個鐘,cocktail同小食,可以請128人。最後我個草地cocktail就剩係請朋友都接近120個。

酒店嗰邊其實樣樣嘢都幾順,係啲staff轉得好快,夾夾埋埋換過3個staff serve我哋。雖然三個都好好,但我都唔係好明點解換得咁多,唔知係咪呢行真係好多人挖角。其實三個staff都幾好,如果佢哋可以再俾多啲細微嘅Details就會更好。 例如蛋糕枱有幾高,或者有無枱布跟之類,可以影多啲相俾啲新人做reference。嗰時我特登走咗上去4次為咗confirm呢樣嘢,差啲諗住唔得就自己買張枱去,好在當日張蛋糕枱都好靚,但如果早啲就可以present到呢啲data就更好。

個package包咗12款食物,8款咸同4款甜,預每人一份。啲食物有人serve,唔會放晒喺度等人搶咁,不過我覺得server好似唔夠多,我諗可能因為咁最後都未必serve晒所預備咗嘅食物。嗰日我其實好忙,都無食過啲嘢,但係聽返朋友feedback同睇返佢哋影嘅相都話好食同埋好精緻。

整體滿意度 
4
服務態度 - 婚前接洽 
4
服務態度 - 婚宴當日 
4
場地環境 
4.5
食物質素 
4
服務承諾達到 
4
價格適中 
3.5
商戶名稱
香港九龍東皇冠假日酒店
婚宴日期 
2016/11/05
是次最終消費 
HK$ 500
 / 位
christyngai06 2016/12/06 22:01:33

因為婆婆住柴灣又年紀大,唔想婆婆咁遠,所以一開頭就諗住旺角或者銅鑼灣會比較多車同方便啲嘅場地。而因為我哋諗住擺三十幾圍,睇完好多酒店都要萬二三起,會over budget,所以起初都係諗住搵酒樓。不過圍數多嘅場地真係選擇唔多,除咗銅鑼灣翠園同利寶閣都無乜睇啱。後來諗諗吓,將軍澳Crowne Plaza又近我屋企,婆婆經東區走廊去都唔係太遠,都係一個好選擇。我覺得將軍澳Crowne Plaza嘅室外證婚草地同ball room 都好靚,樓底夠高又無柱位,於是就決定揀嗰度!我哋book嗰時做緊promotion,又有識人喺入面做,所以都送咗少少嘢,最後大約一萬蚊一圍。我哋嘅婚宴主要由Karen負責,我覺得佢跟嘢都跟得好足,佢又會提下我有咩要交俾佢,問佢攞資料都好快覆我。不過可惜當日in charge婚宴嘅唔係佢。

始終夏天6-8月呢啲時間,會落大雨真係唔出奇,酒店方面喺book嗰時都有提過我哋。一開始酒店方面都要我哋簽一張同意書係就算打風落雨都唔會退錢,但係佢哋會幫我哋轉去室內會議室。雖然都有心理準備,但估唔到最後我結婚嗰日真係落大雨!其實到我哋去到場地嗰時都停咗雨,不過室外塊草地已經完全濕晒, 我著住條大拖尾嘅婚紗真係唔可以行草地。酒店嗰邊都同我哋講唔係唔俾我哋用室外場,只係當時雷暴警告依然生效中,草地又好濕,先唔建議我哋用。我哋後來轉咗入會議室,當然同我想像嘅露天證婚場地差好遠,因為會議室嗰度唔多佈置而且樓底唔太高。不過好在有我自己租咗啲夾椅背嘅花,班兄弟姊妹團夾手夾腳佈置好之後都好睇好多,影相出嚟效果都OK無咁寡。

食物方面,因為我當初無去試菜,嗰時我媽咪就擔心到時餸菜會唔夠食同埋怕出嚟唔得體,不過最後我媽咪覺得好滿意!我爸爸就比較緊張條魚,但可能我哋張菜單比較優惠,要由珍珠躉轉斑每枱要加$1200又太貴,所以都無辦法。好在我爸爸最後食條魚都覺得OK滑!菜式同味道方面都無問題。不過婚宴當晚都有段小插曲,當日有位waitress係炒散,有一位賓客俾佢整污糟咗,但都無出聲。不過後來到收刀叉時整跌咗,又再次整到同一位賓客。因為呢個賓客本來同中菜廳個經理好熟,就即刻去咗投訴。經理即刻交代係臨時工嚟,亦即刻道歉。我覺得都只係啲臨時員工比較唔得,但in charge嘅人都處理得好得體。

場地方面,我覺得整體嚟講係燈光效果方面爭啲啲,因為啲燈只可以全場較光暗,又冇spot light。不過in house audio同video嗰啲都OK,只係有啲背住個screen嘅賓客就比較辛苦。但我嗰時就預早搵我公司啲同事幫我放啲大電視同lighting去補足,因為我係喺production公司做,所以就有呢啲資源。總括嚟講,場地都幾開揚,影相出嚟都唔錯!

整體滿意度 
4
服務態度 - 婚前接洽 
4
服務態度 - 婚宴當日 
3.5
場地環境 
4.5
食物質素 
4.5
服務承諾達到 
4.5
價格適中 
4.5
商戶名稱
香港九龍東皇冠假日酒店
婚宴日期 
2016/06/12
是次最終消費 
HK$ 10000
 / 圍
yellowwm 2015/08/29 20:36:43

我自己住九龍東,加上將軍澳呢間Crown Plaza只係起咗兩三年比較新,又好近地鐵站,所以就揀呢間。 本來係婚禮前同我地接洽嘅sales嘅服務態度好好,但之後佢辭咗職,新嗰位就麻麻地,可能始終有人事轉手所以溝通上有少少落差。

不過婚禮當日佢哋服務超級好,直情想寫封信去讚揚佢哋!當日貼身跟住我嘅妹妹超級細心,由頭到尾都跟足,就連我身邊嘅姊妹同家人都會一一take care,真的非常非常感激佢!部長都十分好人,因為當日多咗成圍賓客嚟到,搞到唔夠位坐。嗰刻我哋真係好㥬惶,本身諗住要additional加多圍,但個部長見到我哋每枱都有啲吉位,於是佢就coordinate啲兄弟姊妹幫手同啲賓客執位,令最尾開得返一圍人出嚟而最後唔洗加錢又人人有位坐,好感謝部長咁為我哋著想。食品方面賓客個個都話好味,而當晚酒店同事知我哋倆個都冇乜點食嘢亦有特登留俾我哋同埋送上房俾我哋之後食返。

另外想提醒其他新人揾場地時要記得親自落場睇返個環境,因為就算我以前都成日去開嗰到飲茶,我都擔心到時結婚嗰刻個環境都會未必一樣。講返我睇Crown Plaza場地時,發現佢哋既新娘房唔係咁夠光,所以就提咗自己既化妝師,再同返酒店員工要求set多兩枝燈。呢啲記得要都要預先準備,如果唔係就會好麻煩。仲有就係如果衡量過人數覺得新娘房唔夠大俾咁多人一齊化妝,就要記得另外安排姊妹同埋屋企人去其他地方化妝而要預備多一間房。所以,如果唔預先準備好,Bigday當日就可能會因為人太多而出現其他突發清況。

整體滿意度 
4
服務態度 - 婚前接洽 
3
服務態度 - 婚宴當日 
4
場地環境 
5
食物質素 
5
服務承諾達到 
4
價格適中 
4
商戶名稱
香港九龍東皇冠假日酒店
婚宴日期 
2014/11/20
是次最終消費 
HK$ 9000
 / 圍